نحن الدرب

نقرّ بأن الحوار التالي هو حوار رديء جدا من ناحية مسرحية، وأنه يبدو ككوميديا درجة ثالثة يقدمها أحد المبتدئين.
لكن الأسوأ في هذا الحوار هو أنه فد وقع فعلا، فهو واقعي...

- إنو اعتقلوا لكم القائد العسكري تبعكم في نابلس هاليومين
- السلطة؟
- ولا اليهود يا روح أمك؟ اليهود ما بيعتقلوا عسكريين...
- شو متوقع يعني من هيك كومبرادوريين؟
- وبعدها بيومين راحول عالمفاوضات وبلعوا شروطهم
- .......
- وزعران فتح دعوسوا مؤتمر رام الله تبع اللي ضد المفاوضات المباشرة...
- ......
- شو ناويين؟
- لا هالمرة جد... فيه تفكير بتجميد العضوية.
- عضوية شو؟ عضويتك؟
- عضوية التنفيذية!
- تنفيذية شو؟
- ولك تنفيذية م ت ف!!
- هعععع! هاي اللي قاعد فيها عبد ربه مستقلّ؟
- هلق لا تخلط المواضيع، بقول لك بدهم يجمدوا عضويتهم في اللجنة التنفيذية
- ليش هما كانوا فيها؟
- عم بتتهبل؟
- لا بس يعني شو هالراديكالية المفرطة؟!
- لا هاي الراديكالية صايرة موضة هاليومين، ظلّكم زاودوا إنتو
- لا ما هو طالما لهلّق قاعدين في التنفيذية مع هالقيادة "المفرطة"، فا أكيد الراديكالية راح تكون مفرطة في هيك قرار
- يلا ظلك تمسخر وقزّم نضالاتنا
- لا بس يعني تجميييد عضوية مرة واحدة؟ اووف!
- يعني إذا بدك بوصلها للجماعة، بقول لهم
- لك شو تقول لمين؟
- لا يعني فيك كمان تكتب مباشرة لملوح وتقول له إنو سنين نضال وخمس سنين سجن كلها ما إلها قيمة وإنو فاسد وانتهازي وجبان وأخو شرموطة...
- هلق روق أنا ما جبت سيرة ملّوح..
- لا ما هو مبين من تهكمك بهاي الطريقة خلفيته واضحة وواضح إنو كعادتك مصر تهين رموز الجبهة وقياداتها، طيب عادي، تهكم، تمسخر، ما إحنا متعودين على هالتهليس.
- إنو ليش هالقد حسّاس حضرتك؟ ولك عن جد ملوح ما كانش خاطر على بالي، بعدين اشمعنى ملوح؟ يعني ليش ما خطر على بالك رموز تانية؟ أحمد سعدات؟ ليلى خالد مثلا؟ طيب على الأقل خالدة جرار؟!
- يا عمي ما في فرق بين هذا وهاذ، هذول كلهم رموز وقيادات في نفس التنظيم وما فيه فرق.. إنتوا بس يسار طفولي بدو يزاود عالعالم
- منيح بس كيف انتقلت بالحديث لملوح؟ وفاسد وانتهازي؟ ولك أنا ما جبت سيرة... رموز!
- ما هو انا عارفك منيح، وعارف مقاصدك..
- والله رفيق شكلو الي على راسو بطحة بيحسس عليها