*يسعد ألله

يسعد ألله
لما تمضي النهار في الشغل، وبعدين في مظاهرة وتروح عليك أخبار القصف، وما تسمعها قبل ثاني يوم مع أخبار ردّ المقاومة عليها
يسعد ألله لما يكون في سلاح زيّ العالم، وحاملينو رجال
يسعد ألله لما تستنّى الردّ من مرجعيون، وتشوفو في نابلس
يسعد ألله لما تصير سديروت جنب نهاريا
يسعد ألله لما تدوّر على شي نكد تكتب عنّه وما تلاقي، لأنّو حتى أخبار القمّة العربية ما عادت تستفزّك
يسعد ألله لما تنسى كأس العالم وزيدان ودحلان وعبّاس وعريقات وتتفرّج بس عالخريطة
لمّا تشوف الضربة جاي بالضبط بين الناصرة وجنين
لمّا تشوف الإسرائيلي بيهدّد وبيقول شو ناوي يعمل
لمّا يكون إنتشال جثث جنود البحرية الإسرائيلية الأربعة قبل وقوعها في يد المقاومة إنجاز كبير لأولمرت
لمّا يفرجوك جماعتهم في الملاجيء ويتمسكنوا
لمّا تشوف خافيير سولانا بيطالب بوقف إطلاق النار مع أنه رفض قبل يومين
لمّا تشوف شي بيشبه الـ إف16 عم بتسقط، وتعرف إنّه التسعة وتسعين طيّار الباقيين مرعوبين
لمّا نصر الله يطلع عالتلفزيون وما يطلب مساعدة من حدا
لمّا تشوف بطّاريات الباتريوت منصوبة عالكرمل عالفاضي
لمّا "الواقعيين" و"البراغماتيين" و"العقلانيين" يسدّو بوزهم هاليومين، لأنّو ما عندهم شي يقولوه
لمّا تحسّ، ولو حتى إحساس بسيط، إنو هالعالم اللي عم بتموت مش عم بتموت كالعادة عالفاضي
لما تكون على وشك إنّك تتفاءل، وتتذكر لمّا تفاءلت آخر مرة أيّام حرب الكويت، ورغما عن هيك بتبتسم وتحاول تتفاءل، لأنّو مش فارقة معك
لمّا تتناسى كارل ماركس والدياليتيك، والتدليك، وما تلاقي جواب غير في أشعار الزير وعنترة بن شدّاد، وتقول معلشّ لأنّو الشعور بالعار هو كمان شعور ثوري
وعشان هيك، وأكتر من هيك، وبناء عليه ، فقد قررت، مؤقّتا، أن أفرح وأن أتفاءل شويّ، وإنّو أتصالح، مؤقّتا، مع ألله

فا
يسعد ألله.... مؤقّتاً
..........

"يسعد ألله: تعبير فلسطيني (أو على الأقل نابلسي) بمعنى "مرحى *